༈ སྔོན་འགྲོ་ནི།
སྔོན་བྱོན་གྱི་དམ་པ་དག་གི་ཞལ་ནས། ཆོས་མགོ་ནས་ལེགས་པའི་རྟེན་འབྲེལ་དེ། །བུ་ལས་ཅན་སློབ་མའི་རྒྱུད་ན་ཡོད། །ཅེས་གསུངས་སྲོལ་ཡོད་པ་ལྟར། ཆོས་སྒོར་ཞུགས་པའི་གྲྭ་བཙུན་དང་གཞན་ནང་ཆོས་ལ་ཉམས་ལེན་བྱེད་འདོད་ཡོད་རིགས་སུ་ཡིན་ཀྱང་དང་ཐོག་ངེས་པར་དུ་སྔོན་འགྲོ་ནས་དབུ་བཟུང་དགོས་པ་ཞིག་ཡིན། དེ་ལ་ཆོས་རྒྱུད་སོ་སོའི་དབང་གིས་ཉམས་སུ་ལེན་ཚུལ་གྱི་རིམ་པ་མི་འདྲ་བ་དུ་མ་ཞིག་ཡོད་ཀྱང་། རྒྱལ་དབང་དཔལ་ཡུལ་བའི་ཕྱག་བཞེས་ལ་མཚོན་ན། ལོ་རེའི་བོད་ཟླ་བཅུ་གཅིག་པའི་ཚེས་བརྒྱད་ཉིན་ནས་ནང་ཆོས་ལ་གོ་མྱོང་རྟོགས་གསུམ་ལྡན་པའི་མཁན་པོ་ཞིག་གིས་འགྲེལ་བཤད་དང་ངོ་སྤྲོད་བྱས་ཏེ། ཟླ་གཅིག་གི་རིང་ལ་གྲྭ་བཙུན་གསར་ཞུགས་རྣམས་ཀྱིས་ངེས་པར་དུ། ཐོག་མར་དལ་འབྱོར་རྙེད་དཀའ་བའི་ཚུལ་ལ་བློ་སྦྱང་། དེ་ནས་རིམ་བཞིན་ཚེ་མི་རྟག་པ། ལས་རྒྱུ་འབྲས། འཁོར་བའི་ཉེས་དམིགས་སྟེ་བློ་ལྡོག་རྣམ་པ་བཞི་ལ་ཡང་ཡང་བློ་སྦྱང་ནས་འཁོར་བ་ལ་སྙིང་པོ་མེད་པའི་ངེས་ཤེས་སྐྱེ་བར་བྱས་རྗེས། ནང་པའི་ཆོས་ཀྱི་འཇུག་སྒོ་དཀོན་མཆོག་གསུམ་ལ་སྐྱབས་སུ་འགྲོ་བའི་གཞི་བཟུང་། ཆོས་ཀྱི་རྩ་བ་སེམས་ཅན་ཐམས་ཅད་ཀྱི་ཆེད་དུ་བྱང་ཆུབ་ཀྱི་སེམས་བསྐྱེད། རང་གི་སྡིག་སྒྲིབ་སྦྱང་བའི་ཐབས་སུ་དཔལ་རྡོ་རྗེ་སེམས་དཔའི་སྒོམ་བཟླས་བྱས་ནས་རང་གི་རྒྱུད་དག་པར་བྱས། རྒྱུད་ལ་བྱིན་རླབས་འཇུག་པའི་ཐབས་སུ་བླ་མའི་རྣལ་འབྱོར་ལ་རྩེ་གཅིག་ཏུ་ཉམས་སུ་བླང་ནས་ཐུན་མཐར་བླ་མ་དང་རང་སེམས་དབྱེར་མེད་དུ་བསྲེ་བར་བྱ་བ་དང་། རང་ལུས་སྣང་སྲིད་ཀྱི་ལྷ་འདྲེ་རྣམས་ལ་འཕང་པ་མེད་པར་ལུས་སྦྱིན་གྱི་དམིགས་རིམ་ལ་འབད་པས་བདག་འཛིན་གྱི་ཁྲི་བ་ཆུང་བར་བྱ་བ་དང་། ཚེ་ལ་ངེས་པ་མེད་པས་གློ་བུར་དུ་ཆོས་ཉམས་སུ་ལེན་ལོང་མེད་པར་འཆི་བ་སླེབ་ན་མ་སྒོམ་སངས་རྒྱས་ཀྱི་གདམས་པ་ཁྱད་པར་ཅན་ཉེ་ལམ་ཕོ་བའི་ཉམ་ལེན་ལ་སྦྱང་བ་དང་། ཟླ་ཆོས་རྫོགས་མཚམས་སུ་སེམས་བྱུང་གནས་འགྲོ་གསུམ་བརྟགས་ཏེ་གཞི་མེད་རྩ་བ་དང་བྲལ་བའི་སེམས་ཉིད་གཉུག་མའི་རང་གཤིས་འཚོལ་བར་བྱས་ནས་རྩ་རླུང་དང་རྫོགས་ཆེན་ལ་རིམ་གྱིས་འཇུག་པར་བྱེད་པའོ། །སྔོན་འགྲོར་འདུག་རྗེས་གྲྭ་བཙུན་སུ་ཡིན་ཀྱང་སྐྱབས་འགྲོ་དང་། སེམས་བསྐྱེད། ཡི་གེ་བརྒྱ་བ། མནྡལ། བླ་མའི་རྣལ་འབྱོར་བཅས་ཐ་ན་གྲངས་འབུམ་ཕྲག་རེ་ངེས་པར་དུ་བསགས་ཏེ་ཚོགས་བསགས་སྒྲིབ་སྦྱང་བྱ་དགོས་པའོ། །
