༈ རྫོགས་ཆེན།
དེ་ཡང་སྔོན་འགྲོས་རང་གི་རྒྱུད་སྦྱང་། རྩ་རླུང་གིས་རང་ལུས་ཀྱི་རྩ་ཐིག་རླུང་གསུམ་ལས་སུ་རུང་བར་བྱས་རྗེས་གཟོད་ཚེ་གཅིག་གིས་གྲོལ་བ་ཐོབ་པའི་ཉེ་ལམ་ཁྱད་པར་ཅན་འདི་ལ་སྦྱང་དགོས་པ་ལས་རང་དགར་ཐོག་མར་ཐ་ན་འབུམ་ལྔ་བསགས་སྦྱང་ཙམ་ཡང་མེད་པར་རྡོ་རྗེ་སྐེད་བཟུང་བྱས་ན་ཕན་ལས་གནོད་པ་ཆེ་བ་ཡིན། དེར་བརྟེན་དགོན་འདིའི་ཕྱག་བཞེས་ཡང་གྲྭ་བཙུན་རྣམས་ལོ་དང་པོར་སྔོན་འགྲོར་ཞུགས་ནས་འབུམ་ལྔ་བསགས་སྦྱང་ལེགས་པར་བྱས། ལོ་གཉིས་པར་རྩ་རླུང་གི་ཉམས་ལེན་བདེ་དྲོད་ཀྱི་རྟགས་མ་ཐོན་པར་དུ་བྱས། ལོ་གསུམ་པར་རྫོགས་ཆེན་ལ་ཉམས་ལེན་བྱེད་པའི་མགོ་བཟུང་ནས་རིམ་པར་ཉམ་ལེན་མཐའ་མ་ཤི་བར་དུ་བསྐྱངས་དགོས་པ་ཡིན། རྫོགས་ཆེན་ལ་ཡང་ཀ་དག་ཁྲེག་ཆོད་དང་། ལྷུན་གྲུབ་ཐོད་བརྒལ་གྱི་ཉམ་ལེན་གཉིས་ལས་འདི་ནི་གཙོ་བོ་ལྷུན་གྲུབ་ཐོད་བརྒལ་གྱི་རིམ་པ་ལུས་ངག་ཡིད་གསུམ་གྱི་རུ་ཤན་སོགས་དང་། ལམ་སྣང་བ་བཞི་དང་སྒྲོན་མ་དྲུག་གི་ཉམས་ལེན་རྣམས་བཞུགས་སྟངས་གསུམ་དང་གཟིགས་སྟངས་གསུམ་གྱི་སྒོ་ནས་ལོ་ལྟར་བོད་ཟླ་བཅུ་གཅིག་པའི་ཚེས་བརྒྱད་ནས་ཟླ་གཅིག་གི་རིང་བླ་མ་དམ་པའི་མན་ངག་བཞིན་ཉམས་སུ་བླང་ནས་དྲོད་རྟགས་ཐོབ་པར་བྱེད་པ་ཡིན། དེ་ལྟར་སྔོན་རྩ་རྫོགས་གསུམ་ལ་ཞུགས་ཟིན་རྗེས་གཟོད་དད་ལྡན་མང་ཚོགས་ཀྱི་རེ་བ་སྐོང་ཐུབ་པ་དང་དགོན་པའི་གྲྭ་པ་ཚད་ལྡན་ཞིག་དུ་གྱུར་པ་ཡིན།
